Transcription
1
Monsieur, jay receu une lettre de vous dattée du Xme de ce moys
2
par laquelle me mandez avoir assisté le passage du cappitaine
3
La Meaulce, Dieu veulle que son voyaige soit plus utille que
4
na esté celluy de ceulx qui sont allez à bas pour semblable effect.
5
Je croy bien quil pourroit autant prouffiter que celluy de
6
monsieur de Mougiron, au moings ceulx de la religion à mon
7
advis y adiousteront plus de foy, daultant quil est des leurs
8
et de ceulx qui se sont meslez bien avant de leurs affaires.
9
Je tiens quil leur peult persuader une bonne paix que Dieu
10
nous veulle donner à la gloire et grandeur de notre roy et
11
repoz de ses subiectz. Nous verrons que prouffitera ledit sieur
12
de Maugiron, mais quil revienne. Jen pourray scavoir des
13
nouvelles par quelcun à qui il en aura compté. Je nay
14
aulcunes nouvelles de la court qui merite vous estre escriptes
15
sinon que du VIIIme de ce moys, lon me mande quil y a
16
plusieurs plainctes de ces retranchemens, lesquelz neantmoings
17
sont necessaires pour le soullagement des affaires du roy.
18
Lon me mande aussi que lon ne parle plus si chauldement
19
que lon faisoit de la venue du roy en ces quartiers, tant
20
pour l’indisposition de sa personne à cause de quelzques
21
especes de fievre carte, que pour les grandz affaires qui se
22
presentent de pardela, lesquelz il ne peult remectre à aultre.
23
Bien ce dict il que monseigneur le duc est pour faire ung
24
voyaige en Languedoc avec forces en cas que ses rebelles
25
continuassent leur oppiniastreté, ce que lon ne veult penser à
26
la court quil facent, ains quilz viendront a quelque composition.
27
Quant à moy, je prye Dieu quainsi soit il et quil len veulle
28
conseiller de recongnoistre leur roy. Cest tout ce que je vous
29
puis mander pour cest heure, qui me fera faire fin à ceste, après
30
mestre recommandé humblement à voz bonnes graces, suppliant
31
le Createur quil vous doinct,
32
Monsieur, en parfaicte sancté tres longue et heureuse vye. De
33
Lyon, ce XIIIIme febvrier 1574
34
Monsieur, depuis la presente escripte, jay receu le petit pacquet cy encloz de monsieur d’Ambrun quil
35
me prye vous faire tenir seurement.
36
Votre plus afeccionné à vous faire servise
37
Mandelot.